無喇喇又爆出「豬流感」，第時唔知會唔會又有「鴨流感」、「牛流感」，聽講呢家嘢仲勁過「沙士」。Jenny尋日晏晝打嚟，話星期三出發去東歐，玩番十幾日，我問佢驚唔驚，佢話應該冇事啩。尋日小妹同個經濟學家老友講開，我話香港政府應該嚴禁港人去墨西哥。個老友話：「不過都可以照去嘅，不過去咗嘅話，一係唔好返嚟，一係返嚟之後即刻隔離番兩、三個禮拜。」
小妹認為，今次應該冇沙士嗰時影響咁大，話晒唔少人都經歷過沙士，今次遇到類似嘅疫症，斷估大家都會提高警覺嘞啩。不過，投機市場係好現實嘅，炒家個個都係為自己着想，見高就拜、見低就踩，美元又再成為資金避難所，早段都冇事，但去到東京市尾段，美元同隻YEN就急升，歐元跌到1.3120，英鎊低見1.4515，隻YEN就升過上96.50，好彩倫敦開市後，歐洲炒家冇乘機踩多一腳。
不過，疫症嘅嘢一係冇事，一爆就好大鑊。美元暫時都會強，但我唔會揸，寧願等佢升吓先至再沽，所以暫時會觀察吓先。
蘇小妹