本文重點
絲絲尋日打開滙源（01886）份年報睇，發現董事長朱新禮○八年包括薪金、花紅、福利等在內嘅總收入高達293.9萬元人民幣，雖然對比香港上市公司啲主席、行政總裁，只係一個小數目，但朱新禮份收入就較○七年勁升2.24倍。喺咁嘅經濟環境下，都算係逆市奇葩。
滙源舊年九月曾覓得戶「好人家」可口可樂，以超高價提出全面收購，滙源差點嫁入豪門，朱新禮功不可沒，佢花紅、人工勁升都好正常。雖然單交易後來被商務部叫停，但屬非戰之罪，再講交易否決後，滙源股價打回原形，朱新禮身家見財化水，人工加幅雖屬九牛一毛，但起碼都幫補吓。
追求者眾股價炒上
自朱新禮上周再公開話滙源追求者眾後，洽商入股消息不斷，前日更傳可口可樂擬捲土重來，考慮購入小量股權。滙源股價尋日最多升逾24%，收市升13.4%。不過公司之後發聲明話唔知有關消息來源，目前並無任何股價敏感資料須按例公布。
余絲韻