本文重點
呢排好多中型上市公司嘅舊股東配售股份套現，尋日又有一單，就係李寧（02331），有基金老友話，有人喺市場以14.5至15.2元配售3,200萬股舊股，套現最多6,200萬美元。李寧股價尋日收報15.76元，配售價較收市價折讓約3.5%至8%。
新搞作進軍羽毛球
李寧繼上次買咗內地著名嘅「紅雙喜」進軍乒乓球市場，今次又有新搞作，就係進軍羽毛球市場，佢哋第一步係贊助中國國家羽毛球隊，今次係第5支中國奧運金牌隊同李寧合作。鍾意打羽毛球嘅人都知，日本品牌Yonex幾乎成為羽毛球運動器材嘅代名詞，今次李寧牌打破日本牌子壟斷局面，打入羽毛球器材市場，贊助中國國家羽毛球隊。
李寧已經贊助中國乒乓球隊、體操隊、射擊隊及跳水隊，好似上屆奧運會，李寧牌嘅制服設計令人眼前一亮，加埋羽毛球隊即係將奧運金牌隊「一網打盡」。公司CEO張志勇話，羽毛球係中國參與人數第二多嘅運動，除咗幫助呢項運動普及發展，亦希望成為羽毛球品牌嘅龍頭。絲絲就好期待中國羽毛球隊着上李寧牌運動衫，攞起李寧牌球拍喺下個月嘅羽毛球國際大賽亮相。
余絲韻