本文重點
記得○七年底地鐵宣布同九鐵合併時，最大嘅賣點就係話會產生協同效應，可以削減成本。港鐵（00066）尋日上載咗○八年年報，絲絲又慣性地揭去高管同董事薪酬嗰頁，睇吓邊個人工最高。
一眾高管齊獲加薪
結果發現，行政總裁周松崗（CK）再次成為集團最高薪嘅高管，舊年CK總收入較○七年增39%至1,530萬元，其中同表現掛鈎嘅薪酬大升68%至860萬元。
除咗CK，其他管理層嘅收入一樣有得加，好似財務及業務拓展總監梁國權，收入亦多咗36%；工程總監柏立恒嘅收入就多咗28%。除咗一班管理層，主席錢果豐嘅董事袍金都增加咗20%，至120萬元。照咁睇，港鐵一班高管同董事就率先「體現」咗兩鐵合併嘅協同效應。
睇番港鐵舊年嘅盈利，雖然較○七年倒退咗，但主因只係舊年無乜嘢物業收益入帳，若果計實際嘅經營利潤，其實係上升57%。喺舊年嘅經濟環境下，表現都算係唔錯，加上首年合併功夫應該會特別多，所以一班管理層有得加人工，絲絲都覺得合情合理。
余絲韻