正當大家都認為，全球經濟開始有復甦之際，早前國際貨幣基金組織一個報告打埋嚟，就話呢次全球經濟衰退，由於係逾60年來最嚴重的一次，故認為復甦將會非常緩慢，可謂一盆冷水照頭淋。不過，港股尋日又再上番萬五點，雖然朝早曾經一度算係跌過吓，但午市過後，在一眾藍籌股帶動下，恒指升幅明顯擴大，本地地產股亦見掉頭回升添。由於挾淡倉意味極濃，所以小尾都係講番嗰句，大家真係要小心為上！
至於水泥股尋日亦有唔錯的表現，當中升得最勁嘅係上聯水泥（01060），全日升44.92%，收報0.5元，而山水水泥（00691）亦同樣打入升幅榜之中，不過連續兩個交易日升得咁勁，相信再升水位已不多。
消息方面，工信部正同相關部門研究啟動制訂鋼鐵行業兼併重組條例。據知，內容除會調整出口稅率以及鼓勵行業重組之外，仲會淘汰落後產能，因此相信鋼鐵業及後都將會有一番調整，股友們要密切留意啦。
（小尾）