本文重點
近期樓市氣氛逐步喘定，不過，新界區屋仔嘅租金未見反彈之餘，仲繼續「潛水」。中原龍智烽同Vincent講，元朗加州花園呎租一直回軟，現已下調低至約7.3元，比去年七月11.5元大跌逾36%，日前更錄得創呎租新低成交，租出嘅洋房係金桃徑面積2,021方呎單號屋，以每月1.2萬元租出，呎租僅5.9元。
有區內經紀老友話，目前元朗區毗鄰西鐵站嘅大型屋苑，好似YOHO Town同新元朗中心等，普遍呎租仍企穩10元或以上，抗跌力較同區指標洋房屋苑高，若以呎租計，租屋仔比起租高密度住宅更「抵玩」。
龍智烽仲話，加州花園本月暫錄約8宗租務成交，而買賣成交平均呎價約2,800元。
美聯招聘趁機問樓市
部分代理行近日再度吸納新血，美聯（01200）陳坤興講，公司昨日搞咗金融海嘯後首個招聘會，反應極佳，在中午前已經錄近100名應徵者，更一度聚集超過50人在門外等候，當中有唔少係應屆大學畢業生。今次亦趁機在會上做咗一個問卷調查，發現睇好就業前景嘅受訪者有33%，睇差就有24%，可以見到信心仍然未完全恢復，不過受訪者對樓市嘅睇法卻有少少唔同，受訪者中有約44%睇好樓市表現，睇差只係佔12%，亦因而促使佢哋有意加入代理行列。
（Vincent Lau）