本文重點
TOM集團（02383）尋日上載咗最新嘅年報，由於集團管理層去年大執位，較難比較一班高管人工嘅變幅。但絲絲發現到，去年下半年離開TOM嘅王雷雷，去年總收入雖然較○七年唔見咗六成，得番836萬元，但竟然都多過首席執行官楊國猛嘅498萬元，同埋女掌櫃麥淑芬嘅365萬元。
「猛哥」花紅僅5萬
絲絲開頭諗，自從「猛哥」同「麥掌櫃」加入咗TOM後，「雷雷」就「升」咗做副主席，會唔會因位高而人工都高啲，但後來睇清楚，先發覺「雷雷」收入高，只因高在佢嘅酌情花紅有665萬元咁多，大幅拋離「猛哥」嘅5萬元花紅（「麥掌櫃」更加係無花紅分）。TOM去年業績認真麻麻，無理由「雷雷」嘅花紅會高成咁，如果絲絲無估錯，應該同佢離職有關，話晒好來好去嘛。講開TOM本年報，其實同往年無特別分別，但有一頁佢哋用咗幾得意嘅卡通公仔介紹現時班管理層，算係平實中見心思。
余絲韻