本文重點
唔知係咪畀美國政府鬧得多，受華府幫助嘅財金機構紛紛盡顯節儉之道。好似曾一度貴為美國主要銀行嘅花旗，早兩日開股東會，無提供基本咖啡飲品、甜圈及公司徽號嘅曲奇，咁都冇所謂，但竟然窮到連飲用水都無，搞到小股東飲水都要走出酒店大廳，用酒店嘅飲水機。花旗行政總裁潘迪特（Pandit）就辯稱話，咁做係要凸顯銀行節儉持家嘅一面！
開股東會無水供應
本周二有近1,500名花旗小股東擠進紐約希爾頓酒店股東會會場，目的之一當然係要質詢包括潘迪特在內嘅管理層，點解銀行股價會變到差唔多一文不值（過去一年股價跌咗九成），形同牆紙。本來嬲到出煙嘅小股東，發現喺長達6小時會議中，大會連水都無得供應，講到口水乾，就惟有走出大廳使用飲水機，小股東氣憤咁話，花旗窮到連水都唔畀股東飲，實在太過分。
其實面對艱難環境，花旗今年真係乜都慳，連年報用紙都由粉紙改為普通紙，但有樣嘢就無慳，就係請咗50名保安員，檢查程度拍得住機場入境般嚴密。
余絲韻