本文重點
香港唔少大孖沙除咗落力起樓外，喺推廣文化藝術上亦不遺餘力，好似信置（00083）同新地（00016）就同樣攞到香港藝術發展局嘅獎項，肯定兩集團對推動本地藝術文化發展作出嘅貢獻。
藝發局表揚贊助發展
絲絲啱啱收到消息，信置集團嘅「香港藝術」係連續兩年獲頒發年度「香港藝術發展獎」嘅「藝術贊助獎」，同埋亦首度獲頒「藝術推廣獎」，原來「香港藝術」嘅成立係源自參與西九龍文娛藝術區發展計劃，該集團總經理黃敏華話成立至今已踏入第3年，已舉行逾70個唔同類型嘅展覽及藝術活動，同時亦會為藝術團體提供包括現金及產品等不同形式嘅贊助。
至於新地今次亦獲頒發「藝術贊助獎」，該集團執行董事陳啟銘話獲獎深感鼓舞。集團近年積極推動藝術融入社區，成功例子有沙田新城市廣場外嘅大型廣場「城市藝坊」和馬灣公園，其中「城市藝坊」係由旗下慈善基金喺去年斥資近1億元與政府聯手發展，發展後既可美化市容，又可加入藝術元素，落實將藝術融入生活。
余絲韻