本文重點
絲絲平時約恒豐證券研究部董事林家亨（Simon）食飯，多數都係問佢對股市有乜睇法，近排傾開近況，先知道原來佢上年結咗婚，依家仲係新婚，好Sweet。Simon仲唔覺意透露咗，原來佢同老婆Maggie係有一段「攝影情緣」。
絲絲忍唔住問Simon當初點樣追到Maggie，佢就話：「哈哈，我哋以前係舊同事，我一向都鍾意影相，嗰陣時放假咪約佢一齊去影相囉，咁佢又會做Model畀我影吓相，影吓影吓就慢慢建立咗感情。」
兩公婆旅行影餐飽
後來唔單只Simon鍾意影相，就連Maggie都對攝影愈嚟愈有興趣。好似近排佢哋去埃及玩足9日，就影咗過千張相。影完之後，仲用電腦慢慢執靚啲相，真係好有心機。
絲絲知道，Simon同Maggie平時都好鍾意去旅行，一年會旅遊3至4次，兩公婆除咗會互相為對方拍照外，仲會影好多風景相。
Simon仲話，依家佢老婆影相仲叻過自己。
余絲韻