前日喺1.4538揸咗一手鎊，諗住執番幾十點，但最後竟然可以執百幾點。我見佢第一次衝穿1.46之後回番落去，之後喺1.45八、九十反覆，所以決定平咗倉先。夜晚美國開市前，見佢又再衝穿1.46，雖然跟住都係企番喺1.45九十幾，先至決定追番，最後喺1.4597揸番一手，喺1.4653平倉。點知佢可以升穿埋1.47，但係我唔敢追，話晒成日波幅已經有二百幾點，加上夜麻麻都費事高追啦，倫敦收埋市，入到未必走到。
尋日朝見隻鎊都係做緊1.46五十幾，報價機低位係1.4630，十一點幾見佢做緊1.46廿幾三十幾，認為揸得過，加上小時圖出現下降旗形，但每一棍嘅幅度都係好細，而且仲係喺前晚爆上1.47嗰棍嘅波幅內，所以判斷隻鎊只係整固式嘅調整，所以先至喺1.4632揸咗一手。
不過，隻鎊後來衝到上去1.46七十幾就冇力，之後慢慢回番落去，仲跌穿1.46，下晝英國公布嘅三月份失業率冇預期咁差，但市場擔心英國財政大臣公布新一年度財政赤字可能創新高，隻鎊受壓，仲跌到1.45十幾，暫時都係睇住1.45先，跌穿就止蝕。
蘇小妹