昨日本地魚缸早段高開，恒指盤中一度高見15,396點，可惜好友唔夠功力震散淡友，在獲利盤湧現，及祖國魚缸顯著下跌後，恒指散場報跌407點，報14,878點。國企指數九千關不保，跌317點，報8,721點。
大笨象買貨唔使急
大笨象（00005）跟祖國移動（00941）兩巨頭齊跌，前者跌1.7%，報收51.25元，古勝相信50元關難保，有心買大笨象揸長線，不妨再等一會，遲吓話唔定可以買平現價兩成，即係40元邊上到車。祖國移動首季業績差強人意，股價被質至68.55元，跌2.7%。
祖國缸湖傳聞指，北大人眼見首季度祖國貸款增速驚人，有意煞車，缸邊友擔心資金迅速流走，昨日「六行」普遍向下，當中以建行（00939）插水5.8%最嚴重。雖然唔少大行相繼出吹水報告，唱好紅色地主，不過北大人真係閂水喉，唔單止紅色錢莊生意難做，連紅色地主亦難以集資。加上紅色地主在過去一個月，累積升幅甚為驚人，借勢回吐亦無可厚非。
本地地主減價清貨策略一流，刺激一手樓銷售量大增，可惜二手屋仔市場依舊一潭死水，大小地主速銷新屋仔，旨在清貨套現，唔見得下半年屋仔樓價會飛天。本地地主低位回升，現價較NAV的折讓大大收窄，投資風險大增，股價料難長期高企。
上海實業（00363）已派發去年全年成績表，而今年將積極出售資產，將非核心業務剝離。不過，集團已強調唔會賤賣持續帶來虧損的中芯（00981），但有計劃將相關股權資產，跟阿媽進行資產互換。互換資產呢一點，得到「花旗邦」認同，出報告繼續睇好其前景。
受惠上海未來發展
至於古勝睇好上實，主要係上海已落實打造為祖國的金融中心及其航運中心地位已被確立，未來將有大量外資進駐上海，為當地經濟帶來刺激，其經濟表現將跑贏祖國其他城市，而上海酒店業料在今年第三季逐漸復甦。由於祖國官府推出鼓勵購房政策後，房屋需求增加，存量房水平下降料為上海房地產價格提供有力支持。上實剛派發的成績表，正因為期內通過物業銷售、酒店經營、租金收入及投資物業重估，提供了4.4億元盈利貢獻。上實的業務組合亦甚具防守性，大大減低了面對金融海嘯衝擊的風險，可吸納作長線投資。
古勝