本文重點
內地消費市場龐大，形成業務之間競爭激烈，食品飲料龍頭股康師傅（00322）雖然深明此遊戲規則，但都不忘要大吐苦水。話說康師傅尋日舉行業績公布會，當問到點解包裝水去年銷售量市佔率增加，但銷售額市佔率卻反而下跌時，集團財務長林清棠忍唔住投訴話，因為集團礦物質水去年遭遇一場網絡上匿名兼有計劃嘅「伏擊」，被競爭對手抹黑。佢仲愈講愈興，繪聲繪影，話有人亂編故事，竟然話有礦物質水用家飲後「吐血」，又偽造報告話水質太酸絕不能飲用等。
黑手專搞龍頭品牌
大家梗係好奇，究竟係邊個做嘅？林清棠好坦白咁話，對於幕後黑手已有啲眉目，但就唔可以講出懷疑對象，只係「含沙射影」，話幕後黑手以往幾年都已用過相似手段，專係針對市佔率排第一位嘅品牌，過往包裝水市場一哥娃哈哈亦曾遭遇類似攻擊等。佢最後亦苦口婆心咁叫絲絲千萬別上當受騙，仲要幫佢還公司一個清白。
余絲韻