本文重點
亞洲聯合財務執行總裁長原彰弘最近喜上眉梢，因為佢啱啱升格做咗新老爺，新抱又靚女又賢慧，仲出身名門添。
新抱係辜濂松表姪女
呢位新抱係台灣中信金控董事長辜濂松嘅表姪女，姓顏，係辜董親舅父嘅寶貝孫女，周日喺四季酒店擺酒時，辜董伉儷仲專程嚟見證呢段好姻緣添！絲絲都去咗湊熱鬧，見到一對新人郎才女貌，門當戶對，先至明白乜嘢叫做只羨鴛鴦不羨仙，現場到賀嘅賓客亦讚口不絕。
大家最想知一對新人係點識嘅，原來原籍台灣嘅長原老細去咗日本留學後，阿仔就喺日本出世，香港長大，日文、粵語同英文都頂呱呱，但就唔識國語，於是老竇就送佢返台灣學，無心插柳下造就咗呢段姻緣。
長原老細睇住阿仔終於成家，梗係好大感觸，佢叮囑阿仔成家後就要立業啦！德高望重嘅辜董睇住表姪女大，所以嗰晚佢好似嫁女咁開心，唔單止叫新人早啲製造幾個BB，仲叫台下賓客未結婚嘅快啲結婚，未生BB嘅快啲生BB，逗得大家開懷大笑。
余絲韻