港股昨日隨外圍走低，是大戶震倉抑或係反彈浪尾聲，筆者不得而知。反而有感，大戶仍停留喺炒上落市，若然萬五點現承接，而外圍又回穩，後市仍有機會再試衝萬六點關。國務院總理到訪粵省，並走訪了多家企業，其中一家係基地設於深圳嘅中興通訊（00763），足顯中興行業地位。公司當「紅」，加上明日宣布首季業績，估計表現不俗，就作為股膽之選。
中興去年業績理想，純利達18.84億元，增長40.9%，每股盈利1.079元，現價市盈率25倍。雖然在目前的市況，這個估值似乎不算得上是便宜，但由於公司是今年內地3G產業興起的大贏家，加上在行業手執牛耳，估值貴得有道理。
由於首季以來陸續有3G相關的定單落實，相信明日宣布的季度業績唔會差。近日股市調整，中興股價回調，但仍穩守在26元樓上，昨日收報26.85元。若季度業績真係對辦，股價有條件來個反撲，再試衝30元大關，穿25元止蝕。
配搭其一揀穩穩陣陣嘅長江基建（01038），公司從事基建業務性質穩定，市盈率15倍，息率3.8厘，在市況波動之中，更顯承接力。昨日股價逆市上升0.2元，收報30.4元，便屬一例。小注跟進，中期目標定在34元，穿28.5元止蝕。
由於部分資金轉投具避險功能嘅黃金市場，金價上升，帶動金礦股逆市上揚，靈寶黃金（03330）昨日一度高見3.02元，收報2.97元，升6%。公司就去年業績發盈警的因素已經消化，周五業績前跟風短炒一轉未嘗不可。
帥哥