尋日朝唔知發生咩事，七點幾鐘個市仲係好定，但臨近八點鐘，美元突然急升，隻鎊由1.45四十幾隊到1.44六十幾，歐元就跌咗三十幾點，隻YEN都升咗大約四十點。原本計劃喺九點鐘前做反市，但美元突然急升，所以都唔敢郁手住。晏晝Jenny打畀我，問我有冇入市，我話唔知發生咩事，所以冇入市。Jenny就話佢喺1.4478揸咗鎊。不過我認為好危險，因為一早咁跌法可能係有大事發生，如果完全唔知咩事，大家都係唔好學。
後來睇番新聞先知，隻鎊跌穿1.45後hit到止蝕盤，所以先至急插，另外又睇到話，英國財政大臣戴理德星期三會公布財政預算。喺金融海嘯嘅影響下，因為政府要使多啲錢去刺激經濟，所以唔使問阿貴，起碼喺未來一、兩年，英國嘅財赤肯定會增加，但我反而認為對英鎊匯價有支持，依家邊個縮住縮住嘅肯定仲慘。朝早我見隻鎊突然由1.45十幾急升到三十幾，所以即刻喺1.4538揸咗一手，執番幾十點都好。
蘇小妹