本文重點
近排樓市小陽春，唔少早排出現大蝕讓嘅一手新盤，亦已逐漸收復失地，蝕幅已經顯著收窄，好似信置（00083）旗下沙田御龍山最近亦已落成，睇嚟業主最快下個月可收信入伙。Vincent仲記得，金融海嘯之初呢個新盤係重災區之一，當時有部分業主壯士斷臂，閒閒哋都要蝕兩、三成，但近期有部分成交單位蝕幅已收窄至一成以下。
觀塘工廈兩層轉賓館
利嘉閣石家麟講，御龍山最新成交係五座高層Ｄ室，成交價五百七十二萬元，呎價約六千四百元，比舊年五月買入價只係蝕百分之九點六。由於近期樓價回升，不排除樓盤入伙，有業主可賺錢離場。
愈來愈多內地客來港，令賓館需求大增。Vincent八到，曾經在○七年成功標售嘅觀塘鴻圖道九十號工廈部分樓面，剛剛向城規會申請將物業四至五樓共九千七百四十二方呎樓面，改裝做賓館，預計可提供五十二個房間。代理老友話，幢物業嘅四至七樓由一間專營護老院嘅公司揸住，另部分樓面由教會揸住，要統一業權會較難，至於業主今次只係申請改裝兩層樓面做賓館，在區內來講算係比較少見。
（Vincent Lau）