開咗古先，當年我第一次會考，好記得第一科考數學，試場係無冷氣兼坐滿人嘅中學禮堂。我前面位坐咗個紮馬尾嘅女同學，開考唔夠5分鐘，佢除低外套只剩吊帶小背心，大露背坐喺我前面。長遠前途同眼前刺激之間，考驗我作出取捨嘅能力，我最終決定暫時放低腦中無謂念頭，快手做完份卷慢慢「欣賞」，可惜我始終做唔到六根清淨，頻頻偷望。你可能會問個女仔乜嘢樣？為免最後失望，我故意避開望呢位女同學個樣，我怕「醜」嘛！
我上次提過呢輪恒指升浪唔止升穿15,800點，仲隨時挑戰18,000點。上周恒指最高升見15,977點，升穿15,800點後就過唔到16,000點大關，我落到魚缸仲畀股友圍攻。我明白唔少股友依家面對追唔追貨嘅人生交叉點，無貨喺手更加揼心口，心情難免差啲。今次《東方產經》網上民意調查問股友，趁近期市場對金融股表現充滿憧憬，大家會唔會乘勢買入金融股呢？截至上周末晚上6時，55%人話會，45%人就話唔會。
美大行佳績咪當真？
恒指已企喺15,800點雙底頸線上面，截至上周收市已連升6周，若本周再升，就可以平○七年九月至十月嘅連升7周紀錄，即係恒指升見歷史高位嗰段時間。再睇基本因素，市場近期炒作憧憬金融股形勢好轉，上周高盛、摩根大通同花旗都公布超乎市場預期咁好嘅首季業績，本周再有摩根士丹利、美國銀行、瑞信同富國銀行出業績，大市有無力再升，必然要
實佢哋業績係咪Pass。
美國金融股「強勁」業績，喺好多人眼中如同「高分低能」。唔少人對首季業績提出質疑，唔係話作假，而係數字未能反映實況。理據係盈利透明度唔足夠，當中唔少利潤來自盤房嘅證券交易，外界好難評估，更重要係大部分盈利來源靠得到美國政府援助嘅平錢造就出嚟，情況唔會持久。
大健最近幾星期都係觀望，因為覺得無所適從，明明唔少專家出嚟唱淡，但個市就繼續升。我只可以講，有不明朗因素存在唔代表個市唔升，但就代表升勢脆弱，維持大市「忽升忽跌」睇法，大家要萬分小心。
乾炒波幅「真錢」觀望
好彩紐約Euronext行政總裁尼德洛爾畀咗個幾好嘅解釋，佢話近期升市只因一班無長線睇法嘅「炒家」炒波幅，未有長線坐貨嘅「真錢」大戶入市。佢又話：「真錢投資者仲等緊機會，佢哋正等待、觀望，想確認三月份見到嘅升市係真。當佢哋相信時你自然會知道，因為市場氣氛會完全唔同。」
記唔記得早前提過老編講嘅比喻，放寬市價入帳（Mark to Market）會計準則如同撕走過期牛奶樽上嘅食用限期標籤，意圖眼不見為乾淨。不過，睇近期金融股表現，市場似乎樂意飲「毒奶」。
為牛奶消毒有幾種方法，法國生物學家巴斯德喺一八六二年發明巴斯德消毒法，用攝氏71度煮牛奶15秒，唔同以前用煮沸方法徹底消毒令牛奶失去原味，但由於仲有部分細菌存在，頂多保存一、兩日。後來又有人發明超高溫消毒法（UHT），用攝氏132度煮牛奶1至2秒，牛奶密封包裝後可保存半年，但高溫就會損害營養價值。世事總有取捨，針無兩頭利。
美壓力測試啟示前景
講開考試，唔好忘記美國金融股仲有個壓力測試（Stress Test），據報道下月會公布成績，未來兩周仲會公布測試方法嘅詳情，以提高透明度同公信力。美國最大嗰19間銀行都要參與呢個壓力測試，測試假設未來兩年經濟進一步惡化、失業率急升、樓價再跌時，銀行本身資本有無能力應付未來兩年虧損。所以壓力測試結果對銀行股前景有更大啟示，亦會喺股價反映。
喺度借少少篇幅講私人嘢，睇唔明唔緊要，唔好向我查根問柢，當事人自會明白。「要考第三次係好無奈，但似乎入到直路，平常心應考啦，加油呀，等住同你去牛頭角下邨㗎！」
（大健）