小妹尋日先至返嚟，好彩依家互聯網咁方便，加埋手提電話，可以遙控。我旅行期間都收到Jenny來電，又send SMS問功課，雖然我冇入市，但就幫Jenny避過一劫。話說上星期佢喺1.47揸緊鎊，但隻鎊第二次衝完1.50七幾之後就跌番轉頭，佢喺1.49樓下先至平倉，嘥晒，後來佢send短訊問我隻鎊係咪已經跌完，我話隻鎊升咗個幾月，而且又破過1.50心理大位，調整幅度可能會仲深，如果係我就寧願選擇高沽。原來Jenny認為，隻鎊喺1.48八十幾至1.4920牛皮，應該跌唔落，但經我一講，佢決定平咗啲好倉兼反手沽貨，嗰晚佢都係以沽為主，結果執咗二百幾點。
我望番啲數據，上星期美國公布嘅三月份CPI跌番，今個星期英鎊又會成為焦點，主要係英國會公布上月CPI，仲有零售銷售，暫時睇CPI都係會落番，零售亦唔會突然好轉，加上星期三又會公布三月份失業率，預期會升0.3%，上到3.6%，當然仍然係低，但如果都係轉差，以英鎊距離1.50心理位只係差二百幾點睇，都係趁高沽穩陣啲。上星期隻鎊啱啱守住條10日線收市，但唔似就咁上番去，條20日線1.4653同上升軌1.4600仍然會受到考驗。歐元個勢仲差，除咗跌穿100日線之外，調整幅度更加多過由三月四日至十九日升幅嘅50%，我睇1.30會穿，都係等佢彈到1.31先沽。
蘇小妹