近日華爾街似乎對表現欠佳的數據，又或者其他負面消息的反應轉趨溫和，跟幾個月前一聽見壞消息便如驚弓之鳥比較，樂觀情緒持續在孖屐滋長。不過，古勝未敢過分樂觀，皆因唔少企業首季成績表快揭曉，明晚先有美國鋁業打頭陣，若然成績表太難睇，或者好多企業發盈警，花旗魚缸升浪料告一段落。另一方面，有關加強限制沽空的方案，將於本周三進行投票表決，投票結果跟有關消息，亦會左右花旗魚缸表現。
牛市重臨言之尚早
至於有個別斷估專家指，牛市快將重臨，在下更不敢苟同，皆因由花旗最初的次按問題，引發至全球金融海嘯，對全球金融市場及經濟帶來沉重的打擊，並非一年半載可以解決問題。
即使最近一次G20峰會達成某程度上的協議，唔代表會有大量資金重投各地魚缸，經過超過一年熊市的衝擊，至於要進行六個月甚至更長時間的收集，牛市才有重臨的機會。古勝較傾向相信各地魚缸最黑暗時間或已過去，在歐美兩地透過由官府注資，穩定銀行系統後，基金贖回潮或告一段落，環球經濟前景確露出曙光，但未見大量資金重回投資市場，牛市重臨言之尚早也。
本地魚缸上周五則好淡爭持，恒指報收14,545點，升23點；國企指數微升2點，報收8,574點，但成交額卻上番咁上下，達到715億元。好友相信成交持續暢旺，本地魚缸將愈升愈有，下一關口挑戰15,500水平；淡友則認為經過一輪急升，上周五雖然成交額逾700億元，但未能大幅上升，唔排除大戶開始在高位派貨。古勝則認為在大勢未轉弱前，入場炒作唔係問題，但要保持高度警覺，皆因目前市況仍反覆，由11,500水平反彈咗26%，再掉番轉頭行亦唔出奇。
中國鐵建（01186）上周五公布旗下公司中標長春至深圳公路合約，連同上月公布已中標新建杭州至寧波鐵路客運專線工程、新建南京至杭州鐵路客運專線站前及相關工程、新建鐵路天水至平涼線工程及湘桂鐵路永州至柳州段擴能改造工程等，中標合計約接近300億元人仔，合約定單增長表現良好，料對股價走勢帶來支持。
毛利率正逐步改善
自祖國推出4萬億元人仔的振興經濟方案後，各項大型鐵路基建工程上馬速度加快，令一眾鐵路股股價持續高位企穩，中鐵建股價也一直守穩在9元樓上。祖國鐵路部公布，今明兩年內地鐵路基建投資達每年6,000億元人仔，以中鐵建於祖國鐵路基建業近乎壟斷的地位，應可從中獲取一定數量定單。今年原材料價格逐步回落，有助中鐵建今年毛利率擴闊，預期至二○一五年前，其每年盈利可錄得雙位數增長，雖然其現價估計唔算平，但值得有一定溢價。
古勝