本文重點
雷曼迷債手尾長，金管局推出一大堆措拖，銀行呢排都急急腳試行，特別係錄音就最如火如荼。據一間英資大行嘅個人銀行高層話，試行期間，大家聽番啲錄音帶，聽出唔少趣事。
嗰位高層話，銀行職員介紹產品通常都講過吓風險，到錄音時又要客人好清晰咁答多次，於是整段錄音除咗「係」、「我明白」同「好」之外，最常聽到就係「吓？又問？之前咪講咗囉……」
問完又問 答完又答
除咗問完又問，答完又答之外，有時客人都會講吓自己生活或者私人事，但係礙於錄緊音，職員惟有「殊」一聲叫佢唔好講住，費事私人事都成為錄音一部分，結果全程都係客人一講到屋企人就「殊」、「殊」、「殊」，雖然銀行之後亦都叫職員唔好再咁，不過都算係磨合時嘅小插曲。
中環銀行雲集，一直有唔少雷曼苦主日日示威，仲貼晒所有銀行嘅CEO啲相出嚟，有銀行界人士苦笑話，只要你喺銀行街行番轉，就可以認識晒所有銀行嘅CEO，真係上位做銀行界代表都要諗過。
余絲韻