本文重點
股神巴菲特近排都幾多阻滯，最近又盛傳佢位「御用」高盛銀行家特羅特（Byron Trott）將離開工作27年嘅高盛，自立門戶成立一隻規模20億美元嘅基金，唔好以為佢嘅離職會對巴菲特「好傷」，查實可以有股神着數，據聞股神計劃注資，於是令市場對特羅特成為巴菲特接班人看高一線。
特羅特有意以自己嘅名字，將新基金命名為BDT Capital Partners，主力投資家族企業，與巴菲特嘅喜好如出一轍。現年50歲嘅特羅特，曾獲巴菲特盛讚對巴郡了解透徹。特羅特經常為巴菲特提供購併顧問服務，去年更為巴菲特向高盛注資50億美元嘅交易穿針引線。
巴菲特接受《華爾街日報》訪問時表示，將與特羅特達成適量嘅合作關係，但冇披露金額。事實上，近期有多家大型銀行的銀行家離巢，反映政府對獲公帑打救嘅金融機構實行薪酬限制及更嚴格監管，令銀行家意興闌珊。
接班人眾說紛紜
市場對巴菲特接班人揣測多時，巴菲特自傳《雪球》作者施羅德表示，特羅特係最佳候選人。不過亦有人意見迥異，對沖基金T2 Partners董事總經理蒂爾森認為，巴菲特很可能在巴郡內部挑選接班人。