恒指昨日雖然反彈，但交投淡靜，大市成交額僅490億元，屬強弩之末，抑或大漲小回？筆者只覺在萬三點水平，做淡做好都未必夠水位，故傾向相信，大戶會再推高股指，等儲夠淡倉再度出擊。
近兩個星期升到火紅火綠的國企股紛紛熄燈，游資要發掘新路向，見昨日不少細價股有異動，食住個勢，今日就揀三隻炒股，股膽選創新能源（00702），再配陽光能源（00757）及中芯國際（00981）。
創新能源近月消息不絕，先係主席換人，然後宣布與中國林大（00910）合作，投資生物能源發電項目。老實講，每次某一投資概念興起，變身股中總少不得呢批股仔加入炒作行列，但最終變身成唔成功，則另作別論。
故此，如今選創新作為股膽，主要有見其股價走勢似模似樣，加上有消息配合，順勢跟上車炒一轉而已。睇走勢，若成氣候，今次升浪應該可以一試0.45元。
陽光能源早前宣布去年純利大幅倒退71%，且減派息，惟股價未見有太大沽壓，相信乃過去數月已累積一定跌幅，先行反映利淡因素有關。昨日股價異動，短線反彈可望試衝1.8元，穿1.54元止蝕。
中芯早前表示有意分拆非核心業務上市，公司為業務去蕪存菁，方向正確。事實上，中芯股價低迷已有一段頗長時間，近年公司積極推動業績轉盈，惜一場金融海嘯，打擊了部署。年內公司與策略股東大唐在3G方面的合作，以及分拆業務嘅進展，可視為刺激股價的催化劑。小注買入，上望0.35元，回吐宜守0.275元。