近排Ivey畀佢個啱啱開始炒匯嘅朋友煩死，前晚佢諗住喺96七十幾沽YEN，但都因為個賭徒性格嘅朋友搞到冇晒心機，所以冇沽到。尋日佢同我講，話個朋友輸錢令佢覺得自己好大責任，我就同佢講，炒嘢輸錢只能怪自己睇錯市，輸大鑊就係因為唔止蝕，唔可以當自己一啲責任都無，好似某啲雷曼苦主咁（當然有好多係值得同情），揩咗嘢就話自己乜都唔識，完全唔知發生咩事，即係因為無知而犯法唔等於無罪，後果始終都係要自己承擔。
前日喺1.3182沽咗一手歐元，皆因見佢升極都上唔到1.32，到紐約市初段，見隻歐元跌到1.31五十幾好似企定，等咗一陣之後決定平倉。尋日晏晝見佢升到1.3251之後跌番轉頭，我見5分鐘圖出現破位訊號，於是喺1.3235沽番一手，但隻歐元好似守穩1.32，仲挾到接近1.33，冇計，暫時沽住先，如果升近1.34先再沽多一手，因為我覺得歐洲央行聽日隨時會宣布準備開機印銀紙！