阿嬌情人餐甩底老公嬲豬

趁今日情人節，去年底榮升人妻的阿嬌約埋關智斌（Kenny）炮製朱古力脆脆及白朱古力撻，Kenny更搞笑地「Chef Lemon」上身，瘋狂唧醬，阿嬌一開始冇眼睇，之後忍不住玩埋一份。

至憎食法國菜

問到今年情人節可有整蛋糕送給台灣老公賴弘國（Michael）？阿嬌笑言：「佢唔食甜嘢o架。（你整佢都夠膽唔食？）我唔整啦，佢都唔食，所以我煮餐飯咪好啲，佢會開心啲囉。」她坦言曾為老公下廚一次：「係整雞翼，因為真人騷一定要整，其實我不嬲識整嘅，但我太懶。（佢好冧？）佢鍾意食嘅，我可以再整。（之後會為佢整多啲？）會。」她坦言想拜師學煮飯：「我真係有諗過做家庭主婦，會的起心肝學煮家常便飯。」

Kenny搞笑地「Chef Lemon」上身，瘋狂唧醬。	兩人整甜品時整古做怪，Kenny仲偷食添！	兩人對完成品相當滿意。

講到去年與Michael共度首個情人節，阿嬌笑言認真難忘：「上年情人節佢搵何超蓮幫手喺香港Book咗間法國餐廳，但我一早話最憎食法國菜，因為要等好耐，所以最終冇去到，留咗喺屋企，佢就同我喺屋企囉，但佢嬲嬲哋。」期間她強調了幾次：「我都唔鍾意，但佢仲要Book。（有冇嗌交？）又冇，但佢有少少Keep住講『Book咗但你又唔去』，不過呢啲嘢都要磨合嘅。」她不忘補多句笑言：「佢話已經叫超蓮同餐廳講定上菜快啲。」

關智斌擺脫獨居

至於單身的Kenny就想盡快搵個伴：「唔可以再慣咗自己一個人住嘅生活，最大問題係一個人煮餸好難預，希望有人同我Share。（屋企人有冇催你？）實催啦，佢哋已經催到冇癮，但見到阿嬌結婚咁開心，同埋我又搶咗個花球，我諗下個點都係我o架啦，哈哈。」

場地：Pandora Cake Shop

服裝（鍾欣潼）：self-portrait、Lane Crawford、apm Monaco

服裝（關智斌）：Lane Crawford