姜濤爆緋聞喊驚：唔會拍拖！
男團MIRROR昨日出席《東華三院慈善障礙挑戰賽》開步禮，在「小鮮肉」姜濤（姜B）的號召力下，吸引半百Fans一早到場守候！對於被傳與妙齡少女拍拖行街，獲封「鮮肉處男」的姜B堅決否認。
MIRROR獲邀為東華三院的慈善跑任嘉賓，雖然昨日不齊人，但有姜B到場，Fans們早已聞風前來霸頭位。當MIRROR大軍殺到，現場Fans即尖叫聲四起！
鬥Sit-up踢毽
大會安排成員分成3隊互相比併，大鬥Sit-up、平板支撐、踢毽和瑜伽動作。負責做平板支撐的姜B，未知是否因身體不適而表現略Hea，但Fans對其一舉一動依然瘋狂。
入行至今姜B都力保處子之身，未有拍拖，但日前卻被拍得在銅鑼灣街頭與一名少女表現親近，姜B急澄清：「唔係拍拖！嗰個係啱啱識嘅朋友嚟，只係送佢去搭車，角度問題好似企得好近，其實唔係。」在旁的經理人「花姐」亦幫口：「我人頭擔保佢冇拍拖，有都要過我雙眼先。」問到可有發展機會？姜B笑言：「要過咗花姐先。」而經理人指拍拖是正常事，沒有禁止成員談戀愛。
媽咪追問戀情
不過，姜B就似乎已被緋聞嚇親，表現抗拒：「咁樣已經傳嚟傳去，所以唔會拍拖啦，怕影響到人又影響到其他隊友。（Fans有冇唔鍾意？）又冇，佢哋好少Care我呢啲嘢，佢哋話唔理真定假，最緊要我開心。（媽咪有冇問？）佢有問，佢都話拍拖好正常，冇乜問題，但我冇拍拖。」至於提到參加的慈善跑，他們稱私下分了兩組作牙骹戰，輸了的一隊要請食午餐，而隊長Lokman稱會相約一齊做健身：「但一定係工作前後先易成事。」