Oscar恨仔 江若琳趕生豬B
新婚燕爾的藝人夫婦江若琳（Elanne）與蕭潤邦（Oscar），婚後首次以夫妻檔孖住出席活動，Elanne坦言正積極造人趕生豬BB，又爆老公想生仔，因為生女會變成「控制狂」，兩人又互餵湯圓，瘋狂放閃！
藝人江若琳與老公蕭潤邦昨日首次以夫妻檔於MOSTown新港城中心出席「Hello Kitty．老夫子『玩』傳統新年」揭幕禮，二人即場合力整湯圓，又甜蜜互餵，盡情放閃Sweet到爆。
生女會好煩
問到婚後可有積極造人？Elanne坦言想趕生豬BB：「因為我認識好多屬豬嘅朋友，佢哋都又乖又易教又孝順，而星座就好想係山羊座，因為山羊座係好男人，再唔係天秤座都唔錯。（即係想生仔？）老公話明想要仔，如果係女嘅話實畀佢煩死呀！條裙短啲又唔得，着小背心又唔得。」
做好準備派利是
提到農曆新年將至，首年派利是的Oscar表示已準備好，笑言不會出埠，一於等大家來拜年：「派利是好有意義，係開心事，同埋啱啱度完蜜月好攰，我哋諗住喺西班牙睇鬥牛，點知就食物中毒變咗『鬥嘔』！所以暫時唔去旅行住嘞！」另外，他又透露有意再發展甜品生意：「我哋隻貓叫『糯米糍』，所以都有諗過開間甜品舖叫『糯米糍之家』，再用貓貓個樣做招牌，不過2019年都係集中火力搞番生煎包先。」