陳慧琳心痛佢問係咪會死！
近期流感肆虐，天后陳慧琳（Kelly）的細仔劉琛亦中招，證實患上甲型流感，發高燒至40度，她要忍痛將囝囝困在家中房間，猶如坐監般，囝囝又喊着問媽咪：「係咪會死o架？」搞到她極之心痛。
Kelly昨日應邀出席「apm開運潮豬迎新春」活動擔任開幕嘉賓，並與新鴻基地產代理有限公司執行董事馮秀炎在各式豬年新春布置前合照。席間Kelly心情無異，但原來早幾日細仔劉琛懷疑在學校感染甲型流感，令她擔心不已：「好驚呀，我即刻要佢喺屋企坐監，隔離咗佢幾日唔畀佢出房，聽日先可以出監。」
傳染畀工人姐姐
她稱兒子發病時高燒至40度：「見佢燒到40度，佢猛話好熱要除衫，成日幾瞓咗喺床度，食咗特敏福，好彩好快退燒，依家好番好多，但都唔會畀佢返學，放埋個新年假先返啦！（放心晒？）係呀，因為佢傳染埋畀工人姐姐，好驚呀！大仔見到細佬困喺房，又唔畀佢入去，話細佬係咪會死？細佬又問我係咪會死？叫我救佢，之前醫生仲用長棉花棒塞鼻孔做流感測試，佢係咁掙扎要幾個人撳住佢，我真係心都痛埋。」
明年紅館開騷
談到工作方面，Kelly透露會入紙申請2020紅館檔期，因明年是她入行25周年。問到會否倣效張學友每3場休息1日？她笑言：「學友開到200幾場就話啫，我要視乎有幾多場先，唔使好多，好似之前11至12場就夠皮，中間休息1日都好。」
另外，提到演藝人協會會長古天樂有意舉行一個具認受性的音樂頒獎禮，已多年沒參加頒獎禮的Kelly，被問若成事可會支持？她坦言：「搞到會支持，我支持古仔嘛！好尊重佢，但唔係咁容易，每間唱片公司都有佢哋自己一套，好難搞。」