洪永城絕招冧女 攬Inez合體修行

現年35歲的洪永城與唐詩詠分手一年多，上月被本報踢爆撻着30歲的模特兒兼長跑教練梁諾妍（Inez），他亦一改以往「收收埋埋」作風火速認愛，還冧讚女友優點多到講不完。而極速融入男友朋友圈的Inez亦腳頭甚好，帶挈Tony事業愛情兩得意，除早前豪擲逾千萬買新樓外，主演的無綫劇《大帥哥》亦大獲好評，難怪Tony錫女友錫到燶。

化身超級撒亞人

昨日下午4時許，一向貪玩的Tony與女友Inez穿上情侶鞋現身數碼港拍拖，自小已喜愛動漫《龍珠》的他，因知道上址正舉行展覽，急不及待帶女友入館玩餐飽，沿途他更不停拉女友與動漫人物合照！在玩「合體修行」遊戲時，兩人更毫不避忌同步擺出4個經典招式，雖然Inez動作有點生硬，但總算配合到男友。其後Tony為博紅顏一笑，還變身超級撒亞人孫悟空，向女友展示「瞬間轉移」的絕招，Inez亦識做地拿着電話為男友拍照留念。

細心指導 Tony攝影師上身，教女友擺Pose。	黐實返歸 Tony笑咪咪攬着女友不願放手，大放閃光彈！	龜波氣功 Tony使出悟空的絕招，連手勢都跟足原著。

踎地影相玩到癲

館內有不少遊人認出Tony，對於其生鬼「舉動」為之側目，但見他與女友玩得如此投入，亦未有上前打擾。雖然途人眼望望，但Tony一於少理，只自顧搵靚位，還教女友站在觔斗雲前Chok甫，而他就踎地化身龍友狂影。Inez眼見男友玩得投入，亦七情上面投其所好。臨走前，Tony不忘狂掃紀念品，最終揀了一頂粉紅色Cap帽送女友，而自己則買了一件T恤並搶着埋單，花了千元氹女友。

踏觔斗雲 難得女友如此投入扮一飛沖天，Tony立即踎地影靚相。	同步變身 兩人玩遊戲時合拍地擺出經典招式。	睇戲醫肚 兩人買飛入場之餘，更買一隻熱狗兩份分。

兩人意猶未盡，再轉場到附近戲院睇戲，入場前Tony買了一隻熱狗和一支水，準備互相分享。直至散場出來，Tony笑咪咪攬着女友邊行邊傾，極為恩愛，連行去停車場也黐到實，怪不得身邊好友都笑他：「洪永城今次真的戀愛了！」