薛家燕等「嫁女」 湯洛雯被爆好多人追
藝人湯洛雯（靚湯）、王浩信、薛家燕、黃致豪及李丞責昨日拍攝無綫節目《新春開運王》，家燕關心靚湯的姻緣，靚湯說：「上次李居明師傅話我有3個人追。」家燕即踢爆：「唔只3個，佢好多人追，好多人嚟探班，我希望佢正式姻緣到，好似嫁女咁，我唔送金豬都送金鏈！」靚湯即澄清：「真係冇人嚟探班，不過3個師傅都話我2020年好事近！（接受閃婚？）細個唔會咁諗，但依家咩都有可能發生。」
她又趁機反擊問家燕是否想閃婚？家燕笑說：「除非我有咗就閃婚啦！但我食咗靜心，所以冇辦法，生B惟有等我個仔同新抱。」靚湯講笑叫她不要經常在屋企阻住兩個後生「造人」，家燕笑說：「我上去前會問一問佢哋先，如果佢哋忙緊我就明。」隨即讚靚湯又乖又靚女，是個好老婆，靚湯則揚言唔心急：「單身都得，不過如果我拍拖，你就唔好上嚟我屋企阻住我喇！」
王浩信想攞歌手獎
肖豬的王浩信今年是本命年，有宗教信仰的他表示也會參考師傅意見，最希望請教音樂方向，坦言很想開騷：「如果呢個階段唔做嘅話，好似一世都冇機會去做，好多觀眾仲記得我唱過吓歌。」問到下個目標是否攞「最受歡迎男歌星」？他說：「希望，但都知唔係一朝一夕做到，需要幾年努力。（搲多啲劇集主題曲嚟唱？）有呀！差唔多每套都畀機會我，希望每次都有進步。」
