蒙嘉慧戒Hea谷伊健
近年養尊處優的蒙嘉慧成功減磅復出拍攝邵氏網劇《飛虎之雷霆極戰》，她透露與準備演唱會的老公鄭伊健一齊健身操弗，除了搣甩肥膏更戒掉壞習慣，又自爆以走音歌幫助老公練歌。
藝人苗僑偉（三哥）及蒙嘉慧等日前在九龍灣為邵氏網劇《飛虎之雷霆極戰》開工，拍攝蒙嘉慧競投名錶送贈三哥的戲份，更出動總值逾千萬元的名錶。
蒙嘉慧以露背晚裝省鏡亮相，早前養尊處優時的圓潤樣子已消失，成功減磅的她笑說：「大家都知我肥咗一段時間，工作嘅原動力好大，瘦咗五、六磅，成個人實淨咗，未去到最弗，但都滿意。依家開工前會去做運動，以前邊會。」她指劇中情緒起伏很大，不時要爆喊，但還未過足戲癮，再拍劇就要看將來機會。
苗僑偉做「愛的替身」
她近期與正準備演唱會的老公鄭伊健一齊操弗，也為對方身體健康高興，她笑說：「好過成日Hea、打機、瞓喺度食早餐呢啲咁懶嘅行為，做運動之後戒咗蹺腳、寒背嘅壞習慣。佢笑我成日督促住佢啲健身姿勢，腰要直啲、要收腹，成個Supervisor咁。」問到會否做老公演唱會嘉賓？她自嘲五音不全，不會獻唱：「我畀到佢嘅幫助就係唱多啲走音歌，佢話成日聽我唱啲走音歌，就要更加揸緊啲音準。」
而三哥透露新一輯《飛虎》動作場面更大型、更國際化，又大讚蒙嘉慧狀態一流，感情戲情緒收放自如，兩人有不少拖手拍拖場面，他笑說：「我做住鄭伊健照顧住佢先。」戴着三十萬元名錶開工的三哥又笑說：「劇裏面我拒絕咗唔要隻錶，我自己就梗係想要啦！」
