視帝倒灶 缺席頒獎禮 張衞健：我嚟做咩啫！
藝人張衞健（Dicky）前晚出席無綫節目《阿姐有乜未見過》錄影，專誠賀汪明荃兼撐「豬朋狗友」蘇永康。之前Dicky憑《大帥哥》競逐視帝，但最終缺席頒獎禮，他對此笑說：「唔使啦！我嚟做咩啫！一直只係想將戲演好，咁多年以嚟幾乎未攞過一個有關演戲嘅獎項，只希望得到觀眾嘅心。我認為人生可以渺小，但唔可以虛度，角色可以戲少，但唔可以Hea做，呢個係我多年嘅宗旨，大帥哥呢個角色我對得住自己、對得住觀眾。（唔在乎視帝？）你話呢？」
唔再宣傳《大帥哥》
之前他笑言會拍到有獎攞，他說：「你知我鍾意講笑，大帥哥唔係咁易畀你捉摸到。」對於《大》劇一班後輩對他失視帝不值，他說：「佢哋見到我嘅付出，感觸大啲啫！（仲會唔會出席《大》劇宣傳？）跟住工作都排滿晒，應該唔會。」
蘇永康被問到可有戥張衞健失落視帝唔抵？他說：「據我所知張衞健係想拍一部佢喜歡嘅港產劇畀大家睇，佢嘅目的已經達到，收視亦證明佢做到，係咪屋企多個亞加力膠，對佢都唔重要。」