不滿蕭潤邦「賓客」名單江若琳威脅唔嫁
江若琳（Elanne）與（Oscar）為本周日舉行的婚禮作最後衝刺，到金舖狂掃「重型」金器，邊試龍鳳鈪邊調情好冤氣。但原來兩人曾為「嘉賓」名單而意見不合，新娘子一度以「唔結婚」作威脅，好在Oscar肯「娶妻從妻」，和氣收場約定開工造人。
藝人Elanne和「生煎包王」Oscar將於本周日擺逾40圍喜酒大宴親朋，前日才有時間到尖沙咀金舖揀金飾，主攻巨型龍鳳鈪，準新娘試戴上手後，Oscar也貪玩試埋一份。之後再試戴斤両十足的超粗金頸鏈，期間Oscar肉緊搣未來老婆面珠！一輪快閃掃金後，滿心歡喜拿住大袋金器離開。
昨日兩人受訪時被問到專揀重型金飾，Oscar玩不文說：「我鍾意粗（操）嘢嘛！」再說因長輩覺得重型金飾能顯得新娘更精神。Elanne則說：「奶奶怕唔夠金器，所以再叫我去試款，媽咪準備咗皇冠畀我做嫁妝，最開心係喺內地嘅九十幾歲阿爺會嚟！（斟茶畀阿爺時咪一定會喊？）我都唔敢諗。」
新娘露背 新郎低胸
Elanne表示當日會着一套裙褂、兩套婚紗及兩套晚裝，只露背不低胸，問會否欠睇頭？Oscar搶答：「我會低胸。」至於玩新郎環節，新娘會派出小肥、前HotCha三位成員、JW等14位姊妹，迎戰Oscar的張繼聰、DJ Donald及細So等兄弟團。問到可擔心玩出火？Elanne搶答：「我會衝出嚟救佢，錫住佢。」Oscar預告婚宴上會給Elanne驚喜。
Oscar爆料曾提議請「特別嘉賓」來贈興，但Elanne卻很大反應：「我話佢唔嚟得，如果唔見咗佢，我婚都唔結。」原來Oscar欲帶愛貓「糯米滋」到酒店影相，可是Elanne擔心愛貓走失，最後亦接受愛妻意見。