江若琳減肥撻Q未試婚紗

藝人江若琳昨日出席聖誕活動，表示這是2018年及婚前最後一個活動，問到本月23日與蕭潤邦（Oscar）結婚的她準備成點？她即大呻：「好崩潰，因為之前忙住拍劇同廣告，搞到唔得閒搞，我諗我係世界上少有就嚟結婚都仲未派晒帖嘅新娘。」她續呻擺酒排位很頭痛：「要諗吓邊個同邊個坐會有話題或者有冇不和。」又笑言還未試婚紗：「本身以為同劉美君拍劇可以減肥，以為佢食得清淡，點知佢成日叫外賣，搞到我減肥失敗，所以依家剩低一個星期會努力做運動。」她透露27日會飛去英國度蜜月，笑說：「但又係乜都未Plan，會去15、16日，今次係睇波之旅。（唔係『造人』之旅咩？）睇吓造唔造到先，順其自然，都想結完婚冇耐就有。」