郭羨妮夠Lucky 橫財送上門
藝人郭羨妮（Sonija）以短裙騷長腿，性感亮相，她笑言懂得策騎，但對投注沒有研究，不過亦會嘗試一下，志在參與，又自言有橫財命：「記得第一年入TVB，台慶嗰陣我有份做司儀，無啦啦畀我中咗架車，真係好似發緊夢咁。同埋都試過抽到唔少現金獎，不過六合彩就未中過，可能啲財運係送埋嚟，唔使自己買。」
談及聖誕節，她表示要陪囡囡溫書迎接考試，又指會擔當督促其學業的角色，但直言怕太嚴格會影響母女感情：「有時見佢學完啲嘢，轉頭又唔識會好忟，所以盡量控制住自己啲脾氣，同埋有同佢傾過，話如果真係搞唔掂就去補習。」
此外，應屆港姐冠軍陳曉華（Hera）、亞軍鄧卓殷及季軍丁子田，戴上六福珠寶首飾為活動行騷。問到以往的男朋友可有送過珠寶做禮物？Hera表示講心唔講金：「其實我會想靠自己嘅能力買多啲，同埋佢都好清楚我比較鍾意啲DIY嘅嘢，未必要係好名貴嘅珠寶。」