林峯珠寶孝敬父母 講感情無「語」

林峯昨日以六福珠寶「愛恆久」系列代言人身份出席「2018六福珠寶賽馬日」，同場還有藝人陳凱琳（Grace）、莊思敏、莊思明、周美欣、楊埕和李美慧等，場面熱鬧！問林峯聖誕節將如何度過？他說：「會同一個細細個就識得嘅好朋友，同埋佢一家人過，因為我啲屋企人聖誕節通常係打麻雀，我又唔識打。」問會否帶女友張馨月出席聚會？他即落閘：「感情事唔講啦！（有傳吳千語想翻撻你？）感情事真係唔想分享咁多。（有開心事先至會分享？）其實一年前都同傳媒朋友講過，想大家專注我嘅作品上面。」

密密送「家傳之寶」

至於跟品牌合作多年，會否經常送珠寶給家人或另一半？他說：「我都好多謝六福，朋友百日宴或者長輩生日，我都會送金銀珠寶，我會攞Discount，亦會買嚟孝敬父母。」他表示始終有日會踏入人生另一階段，都希望品牌屆時可贊助他，笑指不需要父母的家傳之寶：「我呢啲靠自己，啲人成日話我去旅行買手袋，其實我係買畀媽咪，我同佢講要當手袋係藝術品，將來就會成為家傳之寶。」此外，身為馬會會員的他坦言想過當馬主：「好多朋友有問過我，我明年先諗吓，可以當係一個地方或者活動聚會吓。」

余德丞（左起）、丁子田、陳曉華、香港賽馬會賽馬業務及營運總監利達賢、行政總裁應家柏、陳凱琳、六福集團副主席兼副總經理謝滿全、香港賽馬會賽馬事務執行總監夏定安、鄧卓殷、陳靜堯、丁子朗主持祝酒儀式。	陳凱琳計劃送珠寶給腹中B作出生禮物。	周美欣悉心打扮以斜膊裙亮相。

腹大便便的Grace穿上5吋高踭鞋現身，並為「愛很美閃飾秀」擔任模特兒，她表示會小心謹慎。講到老公鄭嘉穎日前出席活動指Grace不用他送聖誕禮物，笑言可能是「戙」他，記者笑指嘉穎可能有被害妄想症，她笑說：「其實佢出席活動前，我同佢出街食飯，我講過話今年互相唔使送禮物，唔想有壓力諗送乜，嗰刻佢又話OK，點知出到嚟就咁同你哋講。（係婚後第一個聖誕節喎？）咁咪夠晒特別囉！」

顏子菲（左起）、梁嘉琪、陳爽、陳倩揚佩戴名貴首飾爭妍鬥麗。	莊思敏（左）與莊思明齊齊騷香肩。	升呢闊太的何艷娟盛裝出席。

陳凱琳鑽戒唔捨得戴

她又指嘉穎送過最名貴的珠寶就是結婚戒指，自己不捨得戴，怕洗手會弄掉：「有諗過送珠寶畀BB做出生禮物，如果係生女嘅，就直接傳畀佢，如果係生仔，就等佢送畀老婆。不過性別要保密，應該聖誕前公布。」問預產期是春天還是夏天？她說：「要再Check吓，不過我依家佗得好舒服，因為冬天佗BB冇咁熱。」早前她透露懷孕後已增10磅，她稱已不敢上磅，只想好好享受懷孕過程。

丁子朗有得放聖誕假，余德丞（左）則要拍旅遊節目。

六福集團主席兼行政總裁黃偉常（右一）及太太、林峯及六福集團執行董事兼副行政總裁黃蘭詩（左一）開心相聚。