黃德斌搵周潤發特訓跑山食塵
藝人黃德斌最近挑戰自我，參加越野賽跑，積極備戰的他原來搵來「星級教練」周潤發特訓！兩人經常跑山，但擁「飛毛腿」的周潤發，齋行都快過他，令他深感佩服！
黃德斌與朱慧珊齊齊為電台節目任嘉賓，大談生活品味。德斌自言其生活以簡單為主：「我做運動已經好開心，覺得做完運動之後食番餐就好正。」還透露下月中會首次參加越野賽，特訓了三個月：「我係志在參與，想體驗吓！」
除了積極備戰外，他還搵來「星級教練」周潤發陪跑，他說：「最近跟發哥跑山，佢跑得好勁，我都估唔到，行已經追唔到佢，跑就更加！另外，我又識咗個教練，佢係專門訓練運動員，佢覺得我好啱跑越野賽，可以試吓。（目標係咩成績？）希望唔好包尾，因為我係跑夜山，怕搵唔到路，希望可以四個幾小時完成。」
朱慧珊：我肯定冇五億
至於保養得宜的朱慧珊，被問到有何護膚心得時，她坦言沒有特別保養：「不過我堅持每日早瞓，冬天會煲紅棗水飲，女人保養未必一定要做啲好貴嘅療程，可以由生活同飲食習慣入手。」她又透露最近為亞視主持一個時事節目，並破天荒由亞視及香港開電視兩台合播。曾主持過《慧珊時尚坊》的她，很喜歡關於生活品味的題材，藉此接觸新事物：「其實好多人都叫我再做呢類Lifestyle節目，我都有興趣，不過團隊好重要，背後要好多人做先做得好，但依家間間電視台都縮減人手，我又唔想求其做。」
早前有指她擁有五億物業，對此她澄清：「我自己肯定冇五億，至於我老公，我都唔知佢有幾多錢，唔好叫我富婆，做普通人開心啲。」