胡曦文婚期聽天命行雷即嫁

前晚Christy穿上紅色低胸晚裝裙，盛裝出席國際美容健康總聯合會IBHGU舉行的「IBH第四屆就職典禮暨亞洲國際美容健康品牌節」，席上她獲頒「亞洲美容健康最具影響力品牌大獎」。對於入行僅兩年已獲得認同，她表示很榮幸：「呢個會好好，可以將我識嘅嘢同人分享，做老師教學生新科技，我依家編排緊時間教，都做咗好多資料搜集。」問到何以對美容有興趣？原來她希望身邊朋友都靚：「好多朋友都話我皮膚幾好，成日都會問，所以諗不如做美容，除咗自己靚，大家都靚咁先開心。」

聖誕拍拖遊埃及

Christy除了美容還有做金融，主力做融資及收購，問到聖誕節會否在港？她透露將去埃及睇金字塔，問是否有男友同行？她大方承認蜜運中：「都拍咗一段時間。（邊類型？）我嘅類型，佢好好，我好滿意。（隨時閃婚？）都可能，要睇幾時行雷，都會想有個家庭。（計劃下年結婚？）睇吓個雷行得幾大，如果快，就快啲。（男友求婚未？）所以話未行雷。」

謝芷倫極速落妝

同場的無綫藝人謝芷倫以「健康美容大使」身份現身，透露與Christy十分老友，經常交流護膚心得：「我哋拍戲成日捱夜，好難早瞓，所以要做多啲運動，食中藥調理。我唔想皮膚化妝太耐，有時一拍完戲就會喺公司落妝，返屋企再徹底清潔，保濕好重要。」忙於拍攝《法證先鋒IV》的她，聖誕將留港賺外快，已接了多個登台工作。

謝芷倫（左起）、胡曦文、國際美容健康總聯合會創會會長彭玉玲與程瑤，對美容各有心得。	謝芷倫為拍劇經常捱夜，故特別重視護膚。	國際美容健康總聯合會執行會長李禮廷（左）及李禮亨，與胡曦文合照。

今次活動，國際美容健康總聯合會創會會長彭玉玲與慈善團體「仁美清叙」主席程瑤合作，還邀請了多位藝人包括黃致豪、陸詩韻、莊端兒、黃竣鋒、馮雪冰及楊光化身模特兒，在晚宴中行慈善時裝騷，最終為「仁美清叙」籌得近6位數善款。