為食加深兄弟情啟華帶隊開餐
早年在無綫常被觀眾認錯的吳啟明和吳啟華，兩兄弟相差一歲，性格各異，啟明較為低調，弟弟啟華則愛熱鬧、愛蒲。啟明坦言兩兄弟年少時雖同一屋簷下，卻培養不出深厚感情：「細路仔時，我跟外婆，佢就跟契嫲生活。到十幾歲一齊去英國留學，嗰邊階級觀念重，高班只能同高班同學玩，所以就算我哋住同一宿舍都少見。返港後先後入無綫，但我入去時，佢就離開TVB，嗰時我哋係一齊住，但我拍劇時雖然唔係主角，但幾套一齊開就冇乜時間返屋企，啟華就出咗去拍電影，又係好少見面，但見面都有偈傾嘅！」
啟明開餐廳後，兩兄弟反而走得更埋，他說：「依家人大咗唔係一齊住，每年幾次家庭聚會先會見大家，但我搞餐廳後，佢覺得我煮啲嘢唔錯，成日嚟食，又帶朋友嚟，所以仲見得多咗，感情係唔錯o架！」而啟華受訪時說：「阿哥啲廚藝好了得，喺屋企食過佢整啲牛腩，真係好正！所以我成日帶拍戲嘅朋友去捧場，我哋感情都可以話從食而走得更近。」
