劉穎鏇練功江嘉敏淪人肉沙包
無綫台慶劇《兄弟》下周一首播，一班靚女「徒弟」劉穎鏇、江嘉敏及朱晨麗等請「師傅」伍允龍食飯，以答謝指導。由於劇中有不少動作戲，劉穎鏇表示於菲律賓拍外景時，伍允龍抽時間於酒店走廊為她練習，她學完即返房搵同房的江嘉敏練，嘉敏笑言慘變「人肉沙包」：「佢嘈住我唔畀我瞓，仲攞我嚟打！」而嘉敏提到有場天台跑步戲，畏高的她拍時有點緊張，而伍允龍拍完自己的戲份，都於現場幫忙檢查威吔及指導她，認真唔話得。
得到眾女讚美，伍允龍表示開心食餐飯，並說：「我做開動作指導，會熟悉一啲，呢套劇大家都好努力咁打，王浩信同楊明都係。我又熱愛功夫，咁出埠收工都係返去打機啫！唔好嘥咗啲時間。」而朱晨麗亦表示對拍打戲又愛又恨。
此外，江嘉敏本月4日生日，正於台灣為無綫劇《殺手》拍攝的她，獲拍檔黎耀祥、高海寧、江美儀及陳豪等為她慶祝，她受訪時說：「我第一次唔喺香港過生日，佢哋成班仲做咗場戲畀驚喜我。」原來監製陳維冠、高海寧及陳豪捧了三個蛋糕出來「招呼」她，嘉敏說：「都係第一次畀人用蛋糕『質』面。」
