歐氏姊妹撞車Total Loss負傷緝兇
模特兒「歐氏姊妹」歐詠珊及歐詠寶日前晚上駕車返家時，被尾隨貨車切線撞向車尾，座駕再失控撞向石壆，Total Loss損失十多萬元，兩女更受傷送院，現最希望捉到不顧而去的涉事貨車司機。
去年曾推出寫真集的模特兒歐詠珊（Janice）及歐詠寶（Yogurt），日前晚上10時許駕車由沙田返回大埔寓所期間，在大埔公路沙田路段發生交通意外！尾隨一輛貨車突然由快線切線到她們駕駛中的慢線，從後撞向Janice的座駕，車身即時冒煙，再反彈撞向石壆，幸後方的私家車及時剎掣，否則或引發連環相撞，後果不堪設想，而涉事貨車不顧而去。
受傷的Janice及Yogurt獲其他司機幫忙Call白車送院，並已報警。兩女全身多處擦損及撞瘀，兼扭傷頸部及後腰，幸未有骨折，因恐防有內傷及後遺症，之後仍需覆診及照X光。兩女的座駕Total Loss，加上剛換了新零件，損失達十多萬元。
身體多處受傷
她們昨日受訪時憶述意外仍猶有餘悸，腳踝紮住紗布的Yogurt，坐直時感到腰部非常疼痛，她們表示意外至今仍不時感頭暈及心口痛，當時負責駕車的Janice直指生死只是一瞬間：「事件發生得好突然，只係幾秒間嘅事，架車出煙，我哋仲聞到（火羅）味，好驚爆炸！睇番影片我哋架車被撞之後失控旋轉，同架貨車擦身而過，如果撞埋去，我哋可能已經唔喺度！可惜鏡頭影唔到貨車車牌，最想搵得番個貨車司機，賠償係小事，但佢應該受到應有懲罰，撞到人唔可以不顧而去。」
兩女可謂流年不利，今年已傷病多次，Janice腰頸更已多次受傷，原來去年她亦發生過交通意外，相當無辜：「舊年坐的士被其他車撞，依家做司機又有意外，呢幾晚都發噩夢，之後揸車都會有陰影。」