張曦雯匿屋企揼心口喊
「打機女神」張曦雯熱愛打機之外，對工作也很認真，要求高得有點苛刻。她自爆入行初期遇到表現不似預期時，會匿喺屋企揼心口兼爆喊，幸而思想正面的她很快便收拾心情！
無綫劇集《跳躍生命線》是張曦雯（Kelly）拍攝的第二套劇集，角色與她真人有點相似，外國長大、思想正面、敢作敢為，令當時演戲經驗不多的她容易掌握角色，她笑說：「我諗嘢好正面，唔開心好快唔記得，阿媽都讚我呢個特質最好。」
拍群戲心跳加速
不過，Kelly對自己的工作要求很高，入行初時表現不夠好，會在家揼心口及匿埋喊，她說：「有時都對自己幾苛刻，依家覺得做得好啲，就對自己冇咁多挑剔。我性格幾內向，最初做司儀唔慣喺咁多人面前講嘢，中文唔好，講廣東話都係一個挑戰，依家習慣咗做司儀，但演群戲都會緊張，郭晉安教我深呼吸控制，唔好畀心跳加快。」
重溫演出打冷震
平時最愛在家打機、睇戲的Kelly，最怕看自己的演出，初時更會睇到打冷震！拍攝《跳》 劇期間，多得拍檔馬德鐘指點，並與她分析劇本：「我拍戲經驗唔多，如果要玩技巧真係唔識，馬德鐘叫我用心去演、投入角色，希望表達出嚟可以感動到人！演戲最難係冇話有一個最好嘅方法，依家學習拍完唔好諗咁多，以前返到去左諗右諗，令自己好大壓力。」
雖然她從沒正式接受演戲訓練，但屋企也有多本演戲「天書」，每隔一段時間翻看也會有得着，覺得累積經驗對演戲事半功倍。
服裝：Ba&sh
場地：九龍貝爾特酒店