為衝15億票房跑到氣咳 周潤發夜夜失眠

電影《無雙》投資方英皇老闆楊受成昨晚「領軍」，率領主角周潤發、郭富城及張靜初等台前幕後聚餐，場面熱鬧墟冚。周潤發笑指莊導「迷戀自己」，又開玩笑指莊父開戲院：「所以佢睇咗我套《英雄本色》100次，發嫂都叫佢唔好行咁近，唔掂就OK！佢收埋咗呢個劇本10年，佢都好大膽向我『表白』。」

原班底有望添食

新片票房走勢凌厲，周潤發形容「好誇張」：「我開心到不得了，幾晚瞓唔着！冇諗過可以咁好，係天時地利人和。今次唔關我嘅演技事，我係『跑番嚟』，跑吓陽明山、奧運村，東跑跑西跑跑，大媽都跟我跑！」莊導笑言其實自己收埋不少同類劇本：「已經發晒霉，係腐乳。（預計最終有幾多票房？）我唔識計，我哋套戲好怪，票房冇一日係有1億，不過日日有啲，有新戲上我哋又死唔去。（原班再開戲？）我哋好似戲班咁，夾慣咗。」而楊受成大讚周潤發、郭富城及莊文強的組合冇得頂，問到會否原班底再拍新戲？他坦言：「睇佢哋點諗，我哋做生意，賺錢就去，蝕錢走都走唔切。」

楊受成（右）激讚周潤發與郭富城這對黃金拍檔。	張靜初	發嫂（中）都有出席聚餐，與片中演員及莊導（右二）合照。

郭富城爆隱藏結局

而郭富城孖住張靜初受訪，他將功勞歸功於整個團隊，又大爆當初莊導拍了兩個結局：「其中一個我冇死，不過依家播出嘅結局係完美嘅，如果有續集我就要翻生嘞。」張靜初表示10年來，今次與郭富城是第二次合作：「我一路有關注他，演技上他走得很快。」提到片中演3個角色，她說：「好像拍了3部電影一樣。（收3部片酬？）如果真是便好了。」城城在旁笑說：「利是也好，意思意思嘛！」此外，城城剛度過53歲生日，提到太太方媛上載全家福「放閃」，他笑說：「其實結咗婚真係人生另一階段，我依家係家庭聚會多，朋友聚會好少，加上工作忙，一有時間都陪吓個女。（每年生日都影一張？）梗係啦！」

另外，現場設抽獎環節，周潤發抽中3,000元現金，不過他沒要，更拿出來再抽過。