近年大台小生流失唔少，過往曾被力捧「四大小生」之一嘅阿紅，除咗幕前演出外，早排仲主力搞吓飲食生意做老闆，搞得有聲有色，工作十分得意嘅佢，感情生活自然備受關注，但佢似乎全部都冇直接承認邊個係另一半，一切以事業為重咁款。
其實阿紅份人好識做，每次出席活動都好主動向傳媒朋友打開話題、交流，好有心咁噓寒問暖，問吓大家近況，可以話乜都傾，畀人強勁嘅親切感，令到關係唔似工作，而係舊朋友敍舊一樣。但當被問到緋聞、感情嘅問題，佢都好識得推搪、閃避，總之唔會直接回應，大家見佢平時份人咁親切，都唔好意思打爛沙盤問到篤，畀條生路佢行吓，避重就輕就算！
