江嘉敏打牌過電讚男友有耐性

每次提起男友，江嘉敏即甜絲絲回應。

江嘉敏（Kaman）、李佳芯（Ali）、高海寧、黎耀祥、江美儀及林利等，昨日隨無綫劇《殺手》的攝製隊出發往台灣拍外景。近日被爆戀情的Kaman提到男友Anthony時甜絲絲說：「拍咗拖冇幾耐，係朋友介紹認識，新年拜年一齊食飯，佢哋打麻雀，我唔識，我坐喺佢隔籬睇，覺得佢好有耐性，因為我不斷問打麻雀嘅嘢，佢都不厭其煩咁答，我好欣賞佢咁有耐性。我當日一坐喺佢隔籬，佢就食咗鋪大牌『嚦咕嚦咕』，但佢話所有運氣都用晒嚟識我。」

台灣過生日盼有驚喜

在台灣逗留三星期的她，被問男友會否到當地探班？她出口術說：「唔知，不過我生日要喺當地過，識做啦。（期待有驚喜？）抱希望，但佢唔係一個好浪漫嘅人。」提到他們被拍得在西貢寓所出入，她否認同居，指對方只是接送她上下班。

李佳芯封視后即買樓

至於Ali因要到台灣拍劇，未能到星馬為頒獎禮拉票，大嘆蝕底。去年成為新加坡視后的她坦言冇信心冧莊：「冧莊仲難過第一次攞。（攞香港視后？）今年要更上一層樓，希望啦，跟住就買樓上車。（叫男友陳炳銓拉票？）有用就會叫，冇用就唔好。」

江嘉敏被拍得與男友十指緊扣行街。	江美儀隨大隊出發到台灣拍外景。	李佳芯恨做視后恨到出口。