滕麗名請假演舞台劇 呂慧儀鎮守錄影廠

滕麗名與小朋友一起玩遊戲，笑到瞇瞇眼 。

滕麗名（阿滕）與呂慧儀受訪時表示，萬聖節將在工作中度過，呂慧儀談到4歲囝囝時即打趣說：「佢暫時唔係好識，最緊張係聖誕節砌聖誕樹啫！（聖誕同佢旅行補數？）我好想去旅行就真，但單立文請咗假同老婆慶祝生日，阿滕要忙舞台劇，所以我要留守，到時帶埋個仔返工囉！」

阿滕則搞笑指預計未來日子會受盡白眼：「我請兩個月假投入舞台劇演出同綵排。（請劇組食嘢補數？）呢樣預咗唔少得。」至於在加拿大成長的陳偉琪表示，難忘兒時逐家逐戶拍門索糖果：「咪睇我好似好強悍咁，見到人哋門口布置有啲陰森，拍門都幾驚！香港反而冇乜氣氛，最多同朋友喬裝去飲嘢！」

呂慧儀萬聖節要開工，昨日先感受氣氛。

陳偉琪最鍾意萬聖節去敲門攞糖。