陳奕迅延續Ellen餘音：She's always with us!
陳奕迅（Eason）昨晚於中環海濱摩天輪下開騷，吸引1,600名觀眾入場，而「核心外圍」超過500人睇免費騷！而早前墮樓身亡的盧凱彤（Ellen）本是The Duo Band成員之一，其遺孀余靜萍亦有現身。Eason獻唱Ellen的歌曲，並答謝她為每首歌曲錄製伴奏音樂。
演唱會於晚上6時15分開始，並於網上直播，Eason太太徐濠縈、女兒康堤、Ellen太太余靜萍、歌手Gin Lee、藝人余德丞、歐鎧淳與男友胡子彤等捧場。在台上手舞足蹈兼扭Pat的Eason興奮的說：「好正呀你哋！出面仲有！好似夢境咁！」
每首歌佢都有彈
他透露一直想公開Rundown，笑言即使公開了，大家都不知道是甚麼歌，因為歌曲來自12月才推出的新碟。他唱出Ellen有份作曲、填詞的《海裡睡人》，以及她原唱的《還不夠遠》，並在台上放有Ellen的結他及一束粉紅玫瑰，他更特別多謝對方：「你哋有冇Feel到？好多聲佢都一早彈定，唔好睇唔到就以為佢冇彈，其實每首歌都有，多謝！She's always with us！（她永遠與我們同在）」
Eason繼續發揮「吹神」本色，自爆睇相被指似猿人：「額頭又斜又彎即係好！流汗就直接由髮線好似瀑布咁流，啲人成日以為我喊！」Eason一度興起轉用普通話吹水，有觀眾大叫他在香港應講廣東話，他笑言現在甚麼語言也要識，又以歌曲《和平飯店》的歌詞叫歌迷平和點！之後他問粉絲音響是否OK，前排、後排甚至場外的觀眾都熱烈揮手回應，他亦大讚好正！
興奮完好想要
他再次透露心願是做跨年騷，笑言希望謝霆鋒不會和他爭期：「我係歌手嘛，佢都係，不過偏向煮嘢，冇我咁大壓力。謝霆鋒幾靚仔，不過乾啲，我就濕啲（成頭汗），我鍾意濕啲，潤啲嘛！」Eason就跟手執團隊舊照的The Duo Band和觀眾大合照，而相內有Ellen。Encore時，Eason表明不會由頭唱多次：「雖然我唔介意，不過無謂啦。通常興奮完就好想要，好似想食兩碗飯咁，不過食到一碗半就覺得早知食一碗，食多個雪糕就啱啱好，依家送雪糕畀你哋，冇理由唔唱呢首。」即唱出萬眾期待的《幸福摩天輪》，演唱會便圓滿結束。