黃美棋接Job冇停手揀豪宅「婚結」
女神即將「封盤」，黃美棋（美棋BB）和歌手男友鍾健威雖屢否認婚訊，但原來兩口子正密謀試婚，被拍得孖住睇富貴愛巢，情到濃時更眾目睽睽攬到實。事業愛情俱有好發展的美棋BB，背後又找得林憶蓮御用堪輿學家雲文子指點明燈，一心行個靚運。
現年29歲的美棋BB和33歲鍾健威（Ray）自公開戀情後，兩年幾來多次傳婚訊，但次次以事業為重否認，日前兩人被拍得孖公仔到尖沙咀區的地產舖睇樓盤，不知是否兩口子為爭取機會見面，打算築愛巢結婚。心水樓更是價值千萬的豪宅，可見這對準夫妻水頭充足。
專攻富貴樓
其實美棋BB重返無綫後，與肥媽合作主持節目《大灣區活好D》，又加盟主持新節目《流行都市》，並參與不同綜藝節目如《大玩特玩》、《誇極限挑戰》及大型綜藝騷《big big channel周年慶典》等，相隔十多年，更有機會再拍無綫劇集《救妻同學會》，跟「人氣王」胡鴻鈞及劉佩玥等合作，明顯大受重用。她工作多自然賺錢多，置業揀豪宅亦冇難度，而睇樓盤期間，同行為他們指指點點的女士，原來是林憶蓮御用堪輿學家雲文子，請得「高人」出關，似乎美棋BB揀樓非齋睇咁簡單！
精選有利方位
睇完「未來愛巢」後，三人行經時裝名店時，美棋BB一見新冬裝上架，就拖住男友，在雲文子陪伴下揀靚衫及飾物，對方專為她挑選紅色衣飾，換上紅裙的美棋BB十足紅衣新娘般開心自轉，而Ray見到女友靚爆鏡，也不理店內有其他客人，情難自禁從後熊抱女友，還用大褸包住情人擺明「私有化」，男友如此情深，女友雖未有送吻，但一支箭般衝去揀同款衫，兩人着上情侶裝後更陶醉地自拍，而雲文子亦變身「攝影師」幫他們拍照。
事事順境的美棋BB，據知頗信風水命理，不時向雲文子討教，對師傅高見言聽計從，昨日她在電話訪問中承認有置業打算：「咁啱睇吓，其實我同阿Ray都各有置業目標，所以乘機問吓師傅邊個方位、邊啲樓盤嘅風水會好啲，趁機偷吓師。」又指視對方亦師亦友：「嗰日約咗師傅行街，幫我哋揀衫，因為佢同我好有緣，做咗朋友後，佢都好想我哋好，所以揀衫都會畀吓意見。」