亞姐冠軍梁雪瑤蝸居公屋20蚊醫肚

出身基層的應屆亞姐香港賽區冠軍梁雪瑤（Sheryl），未有因為當選而聲價十倍，據知一家六口仍住在300呎公屋。日前穿露肩衫、牛仔熱褲的她挽着手袋於銅鑼灣鬧市閒逛，身高1米73的她頗惹人注目，雖然未被認出亞姐身份，但不少人見到靚女都望多兩眼。她邊行邊篤手機，隨後步入一間大型平民時裝連鎖店，見她主攻秋冬季新貨，當見到一件減價Sharp醒黃Tee，即拿上手走到鏡前左照右照，不過行了半小時，最終都兩手空空走人。

打書釘成粒鐘

之前自爆比賽後放肆大吃大喝的她，行完時裝店即急步到附近的小食店醫肚，雖然大排長龍，但她相當有耐性排隊買雞蛋仔，未知是否太餓，買完即大啖大啖食，並眼仔睩睩望住面前的辣魚蛋及燒賣等小食，但可能下月要到韓國受訓，要開始節制，故惟有忍口唔買。

全場服飾幾十蚊有交易，但梁雪瑤都係齋睇冇幫襯。	最好嘅免費消閒娛樂，當然係打書釘。	於城大畢業的梁雪瑤，因冇錢未能出國讀碩士。

之後她行到渣甸坊的露天攤檔睇衫，全場款式只需數十元就有交易，她由街頭行到街尾格價，最終理智戰勝購物欲，齋睇冇幫襯，慳番「幾草嘢」。接着又到商場的書店打躉，睇足成粒鐘，無論是有關建築的書籍或小說，她都特別感興趣，直至收到電話後才匆匆放下書本走人。

梁雪瑤努力搵錢，暫時未想搬離屋邨。

梁雪瑤當選亞姐香港賽區冠軍，稍後會到韓國受訓。

冇自怨自艾

沒有富爸爸的Sheryl叻女當自強，去年曾獲澳洲墨爾本大學取錄修讀建築系碩士學位，卻因未能負擔學費而放棄，但她未有自怨自艾，一直努力拚搏，曾經講過：「永遠記得要笑着面對人生。」又表示能夠完成選美夢想非常感恩，一直低調的她會加緊增值，希望將來有機會再到外國進修。