Cheronna蜜游放閃連體衝線

維港泳昨日舉行，組合Super Girls成員吳嘉熙（Cheronna）與男友黃奕晨（Dixon）、衛詩雅（Michelle）及李拾壹齊齊參加優悠組別，其中Cheronna孖男友以接近半個鐘的成績完成賽事，問到邊個較快上岸？Dixon即指住女友：「同一時間嘅，但正常就佢會快過我！」氹到她哈哈大笑，拍男友心口讚「抵錫」！

事隔一年再參加的Dixon，自爆是被迫「出山」，而「處女下海」的Cheronna則讚好玩，但因VIP組別要分開出發，故未能感受到與市民一齊衝落水的感覺：「最搞笑係游游吓會見有人傾偈、攬住個浮波欣賞維港！」

衛詩雅失眠又途中捱踢，但依然享受其中。	「飛魚」怕鯊魚？方力申講笑咋？	李拾壹與衛詩雅參加優悠組。

不停被打 摸人腳皮

講到途中趣事，她踢爆男友中途偏離賽道，搞到要停低舉手叫大嗌『呢邊』作糾正，Dixon則笑指上岸時太擠迫，不停摸到其他人的腳皮：「香港人行路行得太多，啲腳皮比較『鞋』！」Cheronna有同感，指好似被人打了一身：「好多人又拍落嚟、又踢埋嚟，要避囉！」但下年仍打算繼續參加。

方力申到場為一眾參加者打氣，不惜「整濕個頭」扮落水，但坦言未試過參加：「私人理由！因為我好驚鯊魚，冇防鯊網嘅地方我都會有啲淆底嘅！」指小時候經常睇電影《大白鯊》留陰影，抵死指下年一定要參加，但要睇定心理醫生作準備：「要克服咗先，特別係個恐怖音樂！其實自己都想參加，喺海中間影張相呃Like，出年啦！睇咗醫生先。」

有份落水的Michelle則表示前一晚太緊張致失眠，臨上岸時更受傷：「好多人太逼！係咁有人踢，前面游蛙式嘅女仔係咁踢中我嘅肋骨兩吓，有啲驚就游另一邊，點知隔籬個自由式就踢中我塊面。」